THENZAWL FIELD VENG BRANCH NENA JOINT FELLOWSHIP

  Ni 21 Oct. 2011 a lo her chhuah chuan kum tir aṭanga nghakhlel taka kan lo thlir - Thenzawl Field Veng Tlawh turin Nursery Veng KṬP Member 57 lai mai te chuan City Bus pahnih leh motor te leh two wheeler te in Sikul Tlang aṭangin chawhnu dar 1 ah kan chhuak ta. Tluang takin Thenzawl chu tlai dar 5:15 ah kan lut thei a. Field Veng KTP member ten min lo hmuakin kan thlen In turah min han sem darh ta sang sang mai a, hmelhriat ngai loh Inah zanriah han ei nghal chu a va hreawmin a va hlimawm si em!

Zan dar 6:30 ah Inkhawmna kan nei nghal a, Tv Lalnunfela, Fin.Secy hnen aṭangin Pathian thuchah ropui tak kan ngaithla a, Inkhawm banah Fellowship hlimawm tak kan nei zui nghal bawk.
Ni 22 Oct 2011 tukṭhuan ei kham a lo nih chuan infiamna nei ho turin Thenzawl Vengthar Field lam kan pan leh ta. Chawhma dar 11 velah infiamna hlimawm tak kan hmang a. Mipa Football leh Volleyball ah Thenzawl Field Veng chu kan tlawm der mai. Hmeichhe Volleyball, Mixed Dead ball leh Sairawkherh Inperhsiak hmangte in kan infiam ho a a nuam hle.
Tlai lam a lo nih chuan phur takin Vantawng lam panin kan chhuk leh ta a. Kan kal leh thei lo!!! Vantawng panna kawng chu an lo siamṭhat avangin kan lut thei si lova, a thlang deuhvah Vantawng hnar - Tuirihiau - ah kan kal ta zawk a, kan beisei aiin a nuam kan ti tlang niin kan hria. Phak tawk te te ah nuam kan ti hle.... Zan dar 6:30 ah Pathian biak Inkhawm kan nei leh a, Upa S K Thanga, kan Kohhran Represent hnen aṭangin Pathian thuchah ropui tak kan ngaithla leh bawk. Chhun lam kan chau deuh ni tur ani, mut a chhuak tlang hle. Inkhawm banah Fellowship kan nei leh a, kan Item - Acapella & Duet - ṭha takin kan ti thei a a lawmawm hle.

Ni 23 Oct 2011, Pathianni ah Chawhma Sunday School mahni department-ah ṭheuh kan kal a, theih ang angin pawl kan la ve a ni. Chawhnu Inkhawmah Field veng Branch Leader Pu TDa hnen aṭangin Pathian Thuchah ropui tak kan ngaithla leh a, Group Singing ṭha takin kan va zai thei bawk. Tlai lamah hun awl neiin mahni duhna hmun hmunah kan leng kual vel a, Thenzawl khaw fan hun remchangte la in hun kan hmanga a nuam hle.
Zan dar 6:30 ah Inkhawm nei lehin Tv C Krostlansanga, Leader hnen aṭangin Pathian thuchah ropui tak kan ngaithla leh a, kan hlimin zai pawh a nuam hle a ni. Tichuan, inkhawm banah kan Branch aṭanga member kal te leh Field Veng Branch member awm ang ang te nen thla kan la ho a... Zan dar 9 velah Fellowship kan hmang ṭan leh a, Pu R Lalduhawma, Asst. Leader in kaihruaiin heng kan Branch Items - Musical Drama, Beat Group, Solo (Nl Mercy Biakmuani & Tv Lalṭhazuala) & Trio te ṭha takin kan hlen chhuak thei a a lawmawm hle a ni.

Musical Drama
Changtute :
Tv Vanlalsiama, Pu Lalrintluanga, Nl Lalmuanpuii Sailo,
Nl Vanlalhmangaihi Pautu, Tv Vanlalhuma, Tv Lalhruaitluanga Ralte,
Tv Lalzawmliana, Tv B Lalmalsawma, Tv K Vanlalhriata,
Tv Lalnunfima, Tv Joel Zoramthansanga, Nl R Lalremruati,
Nl V Vanlalsiami, Nl Lalchhandami & Nl Zoramhmangaihi

Solo : Tv Lalṭhazuala

Solo : Nl Mercy Biakmuani

Trio : Tv Lalhruaitluanga Ralte, Nl Lalbiakhluni & Nl F Laldingngheti


Beat Group :
Vocal : Tv Lalremtluanga
Guitar : Tv Laldinpuia Hnamte
Bass : Pu Lalrintluanga (Atluanga)
Keyboard : Tv Samuel V L Hruaitluanga
Drums : Tv Joel Zoramthansanga
Light & Sound duh anga khawih sawn a remchan loh avangin musician te midang zinga ṭhuin zai an rem a, a uiawmin a pawi kan ti hle a, an music leh zai erawh a ṭha thlawt a, a nuam hle.

Zanlai dar 12 alo rik chuan Thenzawl Field Veng nena kan Joint Fellowship Programme duansa chu kan hmang zo ve thei ta hram a, a khawi zawk zawk branch pawhin nuam kan tiin hlawkthlak kan ti hle a. Bana kan han in chibai vel chuan lung te pawh a leng ve dawn alawm le....

Aw le! zing dar 5 alo ri ta, dar 6:30 a Aizawl pana chhuak turin kan han tho ta sang sang mai... duh ai chuan a va hma em.... Kan bungrua te Bus a kan inhlan fel hnu chuan an Sunday School Hall-ah an Leader Pu TD-an ṭawngṭainain min thlah a. Chutih lai tak chuan Bus Conductor, Pu Mafela, chu bus chung aṭangin a tla palh hlauh mai a, a insawh na angreng bawk sia a zialo ngei mai. Tichuan, dar 6:30 pelh hretah Thenzawl chu kan chhuahsan ta.
Kum hmasa lamah Thenzawl Field Veng lo tlawh tawh Luangmual KTP te an lo chetsual tawh avangin rilru thlamuang lo ru deuh chungin Aizawl lam chu kan pan ta vang vang mai le. Hmuifang Tourist Resort-ah duhtawka shooting neiin kan veng Nursery Veng ngei mai chu Ni 24 Oct 2011 chhun dar 12 ah Pathian hruaina avangin tluang takin kan rawn thleng leh ta e.

KṬP Hnatlang @ PUC Zohuan

Nimin tahrik ni 8 October 2011 khan kan Treasurer, Dr.H.Lalthanzara hmalakna lawmawm tak avangin Pachhunga University College ram, World Bank Road hrulah KṬP Hnatlang neih a ni a.

Theih ni se Branch pum pui hnatlanga thawh a chakawm viau laiin, College hotute duh danah mi 25 aia tam lo ni se an tih avangin Branch Committee chuan hnatlang tur te chu hming hmerhin an thlang ta mai a, thlante an kal kim vek thei a a lawmawm hle a ni.


PUC hian an ramah hian thing chi hrang hrang an phun a, hling leh hlo ten an dip ral mai loh nan, an thing phunna lai vel sam fai leh hai ven hna kan zu thawk ber a, a hmei a pain mahni thawh awm tawkah chuan kan ṭul tlang hlawm hle.


Mahni ei tur tiffin kan pai ṭheuhva, chu bakah Dal leh Sangha ṭin chhum ngei mai, Branch Secretary hovin siam a ni bawk a, kan tlaiin kan puar hlawm hle a ni.

Hetianga Branch Inhlawhna ṭha tak mai min hmuh sak ṭhintu kan Branch Treasurer hnenah lawmthu kan sawi a, min hruaitu Pathian chungah kan lawm em em a ni.

Album